《變。變。變。》
小時候最喜歡嘅節日就係農曆新年。三代同堂浩浩蕩蕩的，三十幾人每逢年初一迫爆我爺爺間屋，誇張到要擔櫈仔坐到出屋邨走廊！我爺仔女多，大人喺屋內閒話家常，間唔中某某姑嗲用膠櫈仔兜頭車落佢個百厭仔度，姑腸們又不忘用格字話同粗言互相交流工作狀況，場面既熱鬧又溫馨☺️
我哋一班表堂兄弟姊妹陣容都唔輸蝕，秒速清哂枱面啲年糕、蘿蔔糕、乜糕勿糕後，一行十幾人衝哂落去屋邨嘅遊樂場玩！來勢洶洶成班街童咁，所以其餘屋邨仔都唔係好敢野我哋🙈。打千秋，玩氹氹轉，sir滑梯，伏匿匿......嗌到癲咗！急到就嚟賴都唔捨得去廁所！夜晚食埋開年飯後更有特備節目：掟！沙！砲！🧨成班街童喺爺爺屋外走廊互掟沙砲，偶爾有散兵整親都喊住咁返入屋療傷同俾人開年🤣
由於聖誕同農曆新年相隔太近，可放聖誕假就放唔到新年假，我亦衰心軟明明講好返香港，最終都俾年事已高嘅奶奶喺意大利最重要嘅聖誕節同佢個仔相聚。數數腳趾，已第四個年頭冇返香港過年lu。時光飛逝，爺爺同屋邨一樣已不復見。人大咗變得癲喪不再，反而累經歲月，沉澱下來的，是對熟悉的臉孔同身影那種掛念。不過現實生活中……
你我變了樣
屋邨變了樣
香港變了樣
世界變了樣
這些年頭，未變的，唔想改變的亦隨著年月慢慢改變，儘管有些東西變得有幾面目全非，我都唔會想放棄佢。
身邊多了個大細路黐頭芒，亦令我改變不少；變得嘮叨咗，變得男子氣概咗，變得保姆咗，變得責任感大咗，變得乜都擔心咗……好彩我棚牙暫時冇乜大改變(陰公豬有人喺聖誕假剝咗三隻大牙，依家變咗冇牙佬😝)，但係阿有人話我個躉變巨咗喎🙄
不過無論點變，物以類聚，要讓身邊嘅人和事變得更好，首先一定要努力讓自己成為更好的人。
幸福跟天上的幸運星一樣，不能被摘下來；
但她們會靜靜地降臨在努力把自己變得更好的人身上。
嚟緊鼠年，我都要繼續努力做得更好。
#世界變了樣
#屋邨的氣味
#我愛黐頭芒
#努力做個好老婆
#所以你變咗冇牙佬我都會照顧你的
#你食唔到的我會努力幫你食埋
#農曆新年又到了
#小二快啲攞哂啲乜go勿go出嚟啦
Search